من هو

إسمه الأول على وزن جايز وعمره بحياته ما كان ناجح ولا فايز وعمايله ما بعملوها العجايز، شعللها نار وما بتعرف شو بقصد وشو عايز. بحلم بالبنزين وانه يركب روزرايز وشغله مهلهل وبايز وقشطنا النيرات والبرايز وشغله الشاغل سنساله الذهب فوق البلايز.
قادم من الجنوب وبين الناس مش محبوب وشايف الدنيا بالمقلوب قضاها على المناسف وبشغله مش مقضوب ومن الإرادة مسلوب طفرنا وأفلسنا وفرغنا الجيوب وخلى المواطن منكوب وعلى نفسه محسوب وما بعرف يحكي كلمة من ولا بعرف شو اللي منه مطلوب.
قال بده يصلح إقتصادنا صلحها ضرنا وما فادنا أخذ منا وما زادنا وما صلحها قدام اولادنا وخلى الكردوش زادنا.
رفع الأسعار وهو داير من دار لدار والشباب زقوه على الدور وبنتظر بجائزة اوسكار وعطر من عند العطار ويتقهقر وبعده ما طار، أكله سمك ومحار بغني على ليلو والشعب بغني جني يا دار عمار يا دنيا عمار.
داير بين الحكومات ولنسايبه وأصحابه أعطى التعيينات وكملها علينا بالبنزينات وفي تخبطه بالقرارات عطل تسجيل الإنتخابات وسوالفه مش من راسه وكلها مناورات ما بسمع النصيحة وداير ورا العلاقات ونتيجته صفر بدفتر العلامات وعلى الحيطان كتبوله العبارات "ضربتها مع وافر التحيات وروح وبنقولك سلامات".
الناس يدق الطبل وأخينا مع الطرشان وتاركها ومنجعي بعمان وبطره مولعه وأخينا مش سمعان ودايما سهتان ونعسان.
ومنوس زي بريموس الكاز التعبان لا هو للصدة ولا للردة لعثرات الزمان ... هل عرفتم هذا البهتان.