الشاهد -
اسمه الاول على وزن رعد وبحياته مش سعد وعن عين الحكومة بعد ولمحبة قرايبه فقد ولقضايا الفساد نقد ولحسابه في البنوك بعد الانتخابات جرد. اسمه الثاني قريب من المصيبة وهالايام صار عالحديدة وما عمره قرا جريدة وافكارة من نوعها فريدة .. وجهه زي القمر وقضاها بلبنان سهر وتجاوزاته ما مرت على بشر ومن النيابه يا بي شو هبر ونفسه يركب سيارة همر ويسأل عن راتبه اخر الشهر واغلب لياليه كلها سمر ولسجن الجويدة ما عبر. الباص السريع عملة قضية وبحب الملوخية ومش معروف إله هوية وصيته وصل العالمية وزباينه بدافع عنه بالمواقع الالكترونية وشعراته زراعة مش اصلية والصبح ما يشرب غير ميرامية ويمشي بحراسة امنية وما بعترف بالسنة الهجرية ويا الله شو عنده انانية وبدلاته مش اصلية ومطبع يحب اللغة العبرية وبعطاءاته ما في سرية . مفكر حاله لسه شباب وبوكل من عند ورد وكباب وما بنفتحله باب وللمناوشات كان من اصحاب الارباب وهمه ما يظل حدا حباب وافكاره كلها سراب وبغرفة نومه في قبقاب وما بسمع الا لرباب وما بوخذ بالاسباب ومعصب ما بهدية الا العناب واحلامه اصبحت سراب وما بحب المناسف الا فيها شراب وللمشاكل بسوي حاله عرّاب . بشبه عادل امام وبلبس ببيونة وكله هندام وعلى ود من اهل المدام وبصحى مفزوع من المنام والزباله امام بيته اكوام . لسانه رنان وساكن عمان ومن قرايب شومان لا هو مهندس ولا هو فنان وبالمجلس مش عرفان ودايم مكشر وزعلان وما حدا منه رضيان وبمكتبه يعج بالدخان وعلى الارجيلة خرمان فهل عرفتم هذا الانسان ..!!