اسمه الأول على وزن فريد دوار شعبيات على حساب البلد قديم و مش جديد .بظهر للناس بقلب صلب و حديد و من الداخل برجف و مرتعد كانه نايم على جليد و بين ربعه مش عميد . و بخاف من الوعيد و ما يحترم مواعيد زي التلميذ الكسول و البليد .و لا هو فرحان و لا سعيد و بسمع للعندليب و مطنش فريد خالي الذهن و عقله شريد

بعد ما شاب ودوه الكتاب و بالمدرسة ما فتح كتاب و قال نجح و فوق كله راسب بكل المقررات و ما زال بدرس المطالعة الأول تبع باسم و رباب و عمي منصور النجار و من صفه فلوا الطلاب و ما بعرف جملة بالإعراب و بالاملاء شخبط شخابيط و بحلف بحياة الشباب ، بالحقيبه شايل ساندويش و بالمكتب فارد منسف و على الطريق صحن كباب وصار علينا وزير من بعد الشعبطة مع الركاب

قبل الوزاره ما بطلع من البيت و لا من العماره و بضحك لخبز الصاج و سيارته صافة بالكراج و عند الوزارة صار وصار و لا شيخ عرب بزمانه و لا المختار ، العطر من باريس من بعد ما كان من عند العطار و السيجارة قلبت معاه سيجار و البدلة من سان لوران من بعد ما كانت من حيالله دكان و الجيب صار يخشخش من بعد ما كان طفران و ساق الله على أيام زمان