اسمه الاول بمعنى جهاد وكان بالجنوب يشتغل حداد ولباب مكتبه مركب رداده وليومياته وسفرياته مركب عداد وبحكي عن حاله عنتر ابن شداد .. اسمه الثاني من قطعة الخبز ويالله شو بحب الرز ؟؟ اسمه ابو السفرات والرحلات وما أله صولات ولا جولات وشغل عرض عضلات وما بفهم يعمل البرلمانات وسوالفه كلها فرضيات ومعبي جيبته من المياومات وزي السيارة الخربانة مركون بالكراجات يتهاوش مع حاله وما بمون الا على عياله وعمره ما عنقر عقاله وعمل الخير عمره طاله .. والحظ رفعه وشاله ونايم بالمجلس ونياله. اله علاقة بالتصاريح ومن الفساد دايما بصيح وياما انحرج امام الحيتان والتلاتيح .. دق على صدره كثير وصوته طالع من بير وبصحى الصبح بكير عشان يتابع كل صغير .. وعلى فعل الخير مش متعود مغرور ولنفسه بمجد وبس شغل يقلد .. راسه بحمى زي بريموس الكاز مرة برقص دحية ومرة برقص جاز ومش واصله كهربة ولا فاز وبدون فرامل وبدون غماز وقاعد على كرسي هزاز وبقول عن حاله فقير ومعتاز. افنش وشعر راسه نافش ومنكش وما حدى بحاكيه ومهمش وكثير عليه يقعد بمعرش ودايما مشوش واقع ومفركش .. اكاديمي من طراز قديم وبفكر حاله عليم وبكل اشي غشيم وبقول عن نفسه فطيم ثقيل دم ومش وسيم وبحتفل بشم النسيم بخيل ومش كريم .. فنجان القهوة خرب بيته ووسعله صيته والله يستره من صينيته ..