من هو

الايام بتركض وموسمه قرب زيه زي المواطن والاثنين من السكين ما الهم مهرب الاول يقول للثاني اعتقني سعري بالعالي وانت ما معاك توكل ولا تشرب والثاني بقوله بدي اضحيك ولربي اتقرب وان اطلعت او انزلت ما فيه غيرك انسب .. اتقولي روماني او سوداني ما فيه زي البلدي اطيب.

الاول ما معك قرش تدفأ وبكره بتبرد .. الثاني: على وبرك بدفأ وابتتبغدد الاول كيف ما حسبتها ما بتوفي معك يا مسعد.. الثاني: دللتك وطعميتك وسقيتك وانت قاعد تتجبد .. لا ضريبة بتدفع ورسوم وجمارك .. وكله دفعته عنك وانت بتتنطنط وما رح اخلي عليك من اللحم ملقط .. وراك وراك ولو خليتني بين الباصات اتشعبط..

الاول: فكك من السيرة جماعتي رفعوا التسعيرة وخلوك على الجنط .. وما هيه جاية معك لا قمحه ولا شعيره وما رح اخلي بجيبتك اللي يجيب الفتيله، الثاني: لا تتملص رح اعمل من لحمك تعميرة منسف وملوخية واقطعك بالصينة .. وسياخ مشوية .. وعلى عظماتك اعمل شوربة بالشعيرية .. وعلى كراعنيك فتة غزاوية .. الاول:: سعري صار فوق الاربعمية وبكره بتطفر وبتبيع الفرشة والنملية ومن البيت بتكحشك المرة .. ويقطعو عنك الكهربا والميه ومش بس انا الضحية .. الثاني: سنيت السكين وما فيه رجعه وانا وياك واقعين هالوقعة .. الاول: اجلها للسنة الجاية بتكون امورك ميسرة وجيبتك عمرانة ومعمرة وسعري بكون نزل للمية وما في شي بتخسره .. الثاني: ميه ؟؟ قول خمسمية .. لتروح فطيس تحت سيارة معميه .. او بالحمى القلاعيه..

الاول: قولتك .. اتفقنا .. فيك وفيه .. شرط لا تخلي مني ولا وقيه.