بتكتب وبتنسخ على الورق وعلى النت زادت الق وعلى الله الاتكال والرزق وطاقمها منه جديد وفيه عتيق وصواريخها بتفتق فتق، ونازلة بلي بستاهل رشق وبتقدر كل مسؤول يعمل بصدق .. وكثير منها وقع وعلق وكثير فيها ذاب من العشق. رئيس مجلس ادارتها اسمه صخر مولع بالسيارات والعطر خذ من لسانه القطر ويكفيك شره اذا هز راسه والك شكر. شاطر بالغمزه عند كل همزه وعيلته ابو عنزه وروح المدير المالي وصرنا نقبض عند اول الشهر .. رايق وفايق وما بتعرفله بطن من ظهر يوم بنشكره ويوم بنموت منه قهر .. قادم من حاضرة الزمان وعنده عشق لساكن بسمان ويطرب لسماع اسمهان .. وبالليل بلف شوارع عمان .. ولا يهوى النسوان .. وشارع الصحافة بنادوه اخطبوط وقبطان .. وعنده حكم اكثر من لقمان .. وابيض من الشيشان .. واشقر من الالمان .. رئيس تحريرها بنت السيد نظيره احلامها كثيرة وبالشاهد لها بصمات معروفة وشهيرة عصبية لكنها بتحب شغلها ومقالاتها خطيرة ولو بيدي لحطها وزيرة وبعد الحجاب صارت يانعة وحسناتها كثيرة. مدير التحرير عبدالله العظم شاطر بدق المسامير مستفز الكبير والزغير ومن خباثته بلقبوه شامير والنواب بحسبوله حساب كثير .. البلبيسي فريال ما الها امن ولا امان وبتشم الجريمة بكل مكان وعملت الجريدة للحالات الانسانية عنوان كريمة وبتحب تعطي كمان .. ربى العطار كلماتها بتعمل دمار ولقاءاتها بتفرقع زي البوشار وما الها اي اضرار .. كاتب من هو أب جديد ومشغول بساره على الدوام ويا ويله اذا قصر بالمصروف وما جاب الحليب كمان اسمه على وزن مهتز دايما قرفان .. ربيع العدوان بالرياضة اله عنوان ونايط وبحاول يصير انسان وغايته مع الاخوان .. تركي السيلاوي دايما غافي وبالصورة ما كان شافي .. السايق زياد فايق ورايق ونشيط وبحب اطلع الصور وببل الريق .. القيسي ابراهيم يا الله شو لئيم دينمو وحكيم لما يكون رايق ومعه فلوس وضعه سليم .. ابو مضر لغوي حكيم ورزين وفاهم شغله وبعمله امين .. ايمن الخطيب مخرج تعب على حاله صار رهيب لكنه غير صبور بمل بسرعة ومش كثير تعيب .. العدوي ابتهال والسلف عندها محال وبتسمح للقيل والقال وبصرف الرواتب ما الها مثال روحت رائد واستلمت شؤون المال .. فراس الحرباوي له من اسمه نصيب واسافينه كلها بتصيب خدوم ولما يزعل شو رهيب.. عازف المقسم سوزان بالرد على التليفون لها شأن وشان وهي مش قليلة كمان وممكن تودينا بداهية مش رقم او عنوان .. احمد الفار عند المعلم مستشار نسونجي وافكاره كلها دمار وقرعته بتضوي زي النهار